A cidade herculina acaba de recibir un prestixioso recoñecemento astronómico co nomeamento do asteroide (9605) "A Coruña". Descuberto o 11 de xaneiro de 1992 no Observatorio Nacional de Llano del Hato en Mérida (Venezuela) polo astrónomo Orlando Antonio Naranjo Villarroel, trátase dun asteroide do cinto principal que orbita ao redor do Sol cun período de 3,75 anos, cunha excentricidade de 0,18 e unha inclinación de 2,68 graos. O obxecto recibiu diferentes denominacións provisionais ata alcanzar a definitiva.
Este debuxo ilustra a órbita aproximada do obxecto. O amarelo/azul indican onde o plano
orbital do obxecto está por encima/debaxo do plano da eclíptica, respectivamente. As liñas
de cor sólida amosan as órbitas dos planetas. (Créditos: The Minor Planet Center/NASA)
O nomeamento foi recentemente anunciado no boletín do Grupo de Traballo para a Nomenclatura de Corpos Pequenos da Unión Astronómica Internacional (IAU), sumando A Coruña á lista de cidades e figuras científicas que teñen o seu propio asteroide no firmamento. De feito, este recoñecemento chega tras a recente denominación do asteroide (658642) "Carreira", outorgado pola IAU en 2024 en honra ao astrofísico Emanuel Carreira Vérez, que fora descubierto polos astrónomos Kazimieras Černis (Lituania) e Ilgmars Eglitis (Letonia) en 2017 no Observatorio de Baldone, en Letonia.
Carlos Viscasillas Vázquez. Observatorio Astronómico de Molėtai en Lituania. Observatorio Astrofísico de Arcetri en Italia.
