A Poesía de Avelino Díaz en 'Debezos' (Íntimas) (1)

Proemio á segunda parte
O poemario nomeado Debezos de Avelino Díaz, publicado en Buenos Aires no 1947, está dividido en tres partes que corresponden, en primeiro lugar co apartado denominado "¡Terra a Nosa!" que consta de 32 poemas, dos que xa fixemos no ano 2020 comentario e estudo de cadanseu poema en Galiciadixital; en segundo lugar e como apartado seguinte aparece o que o autor titula como Íntimas, que abranguen 21 poemas e, por último, restan 13 poemas máis da terceira parte bautizada Recanto Nativo con referencias á serra de Meira, Meira e aos seus lugares de estancia e nacemento.
Segundo o seu poemario do 1947 abranguerían as seguintes paxinas e poemas:
!Terra a Nosa!............... 65 páxinas .......... 32 poemas.
Íntimas ......................... 23 páxinas .......... 21 poemas.
Recanto nativo ............. 19 páxinas .......... 13 poemas.
Total............................ 107 páxinas.......... 65 poemas.
Como podemos observar o poemario Debezos ten como apartado principal Terra a Nosa con 32 poemas e as dúas partes seguintes: Íntimas e Recanto Nativo con 34 poemas en total; constituirían os dous xuntos a segunda parte deste libro polo número de poemas e en canto ás páxinas, Terra a Nosa estaría con 65 páxinas e as outras dúas partes (Íntimas e Recanto Narrativo) 42 páxinas, o que nos vén indicar a importancia que Avelino lle deu a Terra a Nosa, sendo ademais os poemas cos que se empeza o libro.
Hoxe proseguimos a nosa andaina e principiamos co estudo dos seguintes poemas de Avelino Díaz no apartado que el denomina Íntimas e que segundo nos reza o título sería o encargado de abrollar como fonte a auga dos sentimentos máis puros, fondos e persoais porque segundo a RAG (Real Academia Galega) a palabra "Íntima" trátaa como un adxectivo cuxos significados están totalmente relacionados cos poemas que Avelino crea.
Vexamos os seus significados:
1.- "Que existe no máis profundo e interno dunha persoa". Este sería o significado máis adecuado sen despreciar aos seguintes
2.- "Que ten os seus elementos estreitamente unidos ou relacionados" cos feitos que irán acaecendo no proseguir dos seus poemas.
3.- "Que é mostra dunha grande confianza, unión, comunicación, etc., entre dúas ou máis persoas" e ás veces referido a outros campos como a natureza ou o mundo dos nenos.
4.- "Que está ligado a alguén con fortes lazos de amizade" como ocorre co poema "¡Fogar, doce fogar!" ou "Sabeliña" onde os lazos ademais de todo son amorosos.
5.- "Que pertence a un individuo en particular e que, xeralmente, permanece oculto aos demais", é dicir, que son teimas ou sentimentos propios do autor e ocultos ata que saen a luz dos seus versos.
6.- "Que permite unha relación íntima ou se produce entre xente íntima" como son os seus recordos dunha Galiza que aínda está no seu corazón.
Segundo a RAG tamén pode ser substantivo masculino plural, "íntimos" ao que dá o seguinte contido
7.- "Persoas con quen se ten unha relación íntima", mais no caso de Avelino trata tamén Íntimas como un substantivo feminino plural e referido a aqueles sentimentos que chaman a atención do autor como se fosen cousas intimas ou intimidades, como poden ser os seus desexos, a liberdade, o fogar, a fortuna, a dor, as lembranzas, os bicos, etc., que iremos degraendo como se fosen espigas da súa finca poética e con semente degraída e despois sementada e abrollada en poesías únicas e sinxelas que van caendo no cesto poético das lembranzas do noso Avelino.