Dous Obradoiros contra Altri

O día 15 de decembro houbo unha manifestación contra a celulosa que queren poñer en Palas de Rei. A plataforma Ulloa Viva convocounos a percorrer as rúas de Compostela na defensa dun medio de vida e dun xeito de vivila. O resultado foi que a praza do Obradoiro encheuse dúas veces e dúas veces houbo que ler o manifesto e facer as intervencións programadas. Coido que en poucas ocasións fai falla duplicar un acto por mor da asistencia.

Polas rúas de Compostela andaban familias enteiras para dicir que queremos seguir respirando aire puro e bebendo auga limpa. Dixéronse moitas cousas e berráronse lemas a prol da vida e dun medio que non temos dereito a lixar, xa que nos foi prestado e así debéramos legalo. Entre a festa reivindicativa xurdiu a ledicia de ver ás amizades polas esquinas da loita, mais tamén xurdiu o medo a que nos rouben a saúde, a terra e con ela tantas ledicias que nos dá.

Non sei se estes catedráticos de Altri verían dúas prazas de analfabetas e analfabetos. O que si sei é que un deses catedráticos dixo aquilo de "no hacemos inversiones donde no nos quieren". Pois a xente que non os quere encheu dous Obradoiros que berraron alto e claro ALTRI NON!