Hai máis de tres décadas que demos en facer anualmente cadanseu libriño co título de 'O NADAL', no que viñemos recollendo os traballos premiados nos Certames de poesía e xornalismo convocados por este Centro Cultural, para espallar e gardar memoria de especiais creacións que van conformando un corpus literario arredor -ou como base- do Nadal en Begonte, que tivo a primeira expresión no Belén creado en decembro de 1972 por José Domínguez Guizán e José Rodríguez Varela.
Se a nosa historia supera o medio século, temos a sensación de estar recomenzando, reafirmando, impulsando o labor de tanta xente, de tanto tempo, emprendendo accións de futuro que honren o xa conseguido, que nos afiancen de cara ao futuro.
Aválannos a devoción dun pobo, infinidade de amigos que nos visitan, a ilusión dos nenos, a compracencia dos maiores, a satisfacción de todos... O noso Belén está declarado "de interese turístico galego", un gran mural "fala" de nós á beira da N-VI, e en cada parroquia do Concello unha talla de César Lorenzana orienta cara á sede do Belén aos camiñantes... E abrimos de novo as portas a todos os que queiran ver un Belén inocente, para nenos, para maiores que queiran facerse nenos, para os que saiban ver o que hai "detrás" dunhas figuras en movemento que pretenden que non se esqueza a tradición do Nadal, que se reproduza a vida nunha aldea da Terra Chá doutrora, para os que queiran saber por que o nome deste pobo é xa o de "Begonte do Belén".
Un ano máis, e van 53, volve ser verdade o poema de X.X. Piñeiro Cochón, que se admiraba:
E a quen se lle conte:
de novo en Begonte,
armouse o Belén.
Temos unha obriga moral, un dereito especial e unha devoción inconmensurable por facelo, xa que nos sentimos gozosos habitantes dun pobo que todos coñecedes como BEGONTE DO BELÉN.
Benvidos todos, benvidas todas, ao voso Belén, á vosa casa, un ano máis, e sempre!
Xulio Xiz
Presidente do Centro Cultural José Domínguez Guizán
