Hoxe de novo achegámonos a Lugo, esta vez ao Centro arqueolóxico de San Roque. Neste edificio de nova creación atópanse in situ restos dunha das necrópoles da cidade romana Lucus Augusti.
A necrópole, datada entre os séculos I e V, estaba situada a carón da Vía XIX, no exterior da cidade e
permaneceu fóra cando se construiu a muralla.
Consérvanse un estanque, un forno de cerámica e diversos obxectos funerarios. Ademais pódense apreciar reproducións de enterramentos.
A guía explicounos que se supón que o estanque tiña funcións rituais funerarias. Os relevos polos que circulaba a auga fan pensar nunha influencia oriental. No momento no que perdeu esta función pasou a servir aos usuarios da Vía XIX.
Do forno cerámico consérvase a parte baixa, na que se facía o lume, e as bóvedas que soportaban o seguinte nivel, onde se colocaban as pezas para cocer. A carón do forno apareceron restos de tellas e outros elementos empregados na construción.
Moi próximo ao forno observamos o resto dunha tumba de séculos anteriores a este.
Finalmente puidemos apreciar reproducións de enterramentos, tanto de incineración coma de inhumación, acompañados de restos orixinais de enxoval funerario.
