Onde saían os atracadores? Da Feira de Castro.
Isto que vou contar foi despois da guerra, aló polo ano 42 ou 43, se acaso. Os atracadores andaban por todas as feiras porque a canina era moi grande, e cando lle
vían a algún cobrar unha vaca ou unha besta íano esperar ao punto máis o xeito que atopaban para tal fin.
Un día un home de Vilela, chamado O Gallego, vendeu unhas vacas en Castro, porque trataba algo nelas, o día 8 de maio, vírono e fórono esperar ao curro de Toré, en Vilela. Dous homes pedíronlle os cartos e el negouse a entregárllelos e quixo pegarlles, ía canda el un fillo pequeno. Os atracadores sacaron dúas pistolas, era así polas seis da tarde e pegáronlle dous tiros ao señor e matárono para logo sacarlle os cartos que levaba da venda das vacas, Ao pequeno deixárono e saíu chorando ata unha casa que había non moi lonxe de alí. Os da casa foron co pequeno e viron o pai morto. Foron a Rábade pola garda civil e polo médico que certificou a defunción, logo veu o xulgado e levantou o cadáver e nunca máis se soubo quen foran os que o mataron.
Texto: Xosé Otero Canto
Ilustracións: María Guerrero
