Como se fai para mirar unha vaca nunha feira antes de mercala.
1.3. Mirarlle "As Lurpias", tamén chamadas "Crecientes".
As lurpias están no pescozo, xunto das pernas dianteiras, ollando sempre que sexan iguais as dúas e sempre
que non sexan grandes.
Para mirarllas, hai que abrazala -hai que ver que cousas facían os nosos devanceiros, dándolle apertas ás vacas, non me estraña nada que soubesen tamén dos seus sentimentos e das súas inquedanzas e que houbese unha comuñón entre as vacas da casa e os homes e mulleres que as mantiñan, pois a vaca, na nosa Galiza, sempre foi o eixo sobre o que xiraba todo, o que chamariamos a "vacacracia", ou a vaca como centro vital da familia e da contorna-.
Diciamos que había que abrazala, abrazarlle o pescozo e coas dúas mans a un tempo apalparlle as dúas lurpias, posto que se as lurpias son grandes, é sinal de que a vaca é ou pode ser tuberculosa. Nunca poden ser desiguais as lurpias.
Se a unha vaca se lle ven as lurpias sen apalpalas, é mal síntoma e indícanos que a vaca é enferma.
(Continuará)
Texto: Xosé Otero Canto
Ilustracións: María Guerrero
