Se puidera escoller...

Se neste intre
eu puidera escoller...
pediría ser paxaro.

Ser paxaro
pra facer un niño
no cumio dun piñeiro.

Ser paxaro
pra chocar dous ovos
e criar dous paxariños.

Ser paxaro
pra vivir do que atopara nos camiños
sen que ninguén me rifara.

Ser paxaro
pra trilar a gusto
e alegrar a moitos sen molestar a ninguén.

Ser paxaro
pra, dende o ceo,
ver as grandezas e as miserias da terra.

Ser paxaro
pra, dende arriba,
cagar na cara de tódolos corruptos.

Ser paxaro
pra poder subir ata o firmamento
e, sobre todo..., pra voar.

Se puidera
escoller...
pediría ser aguia e non voitre.

Aguia pra voar moi alto,
pero nunca un voitre
pra non escaravellar na prea nin aproveitarme do mal alleo.