O papel do papel

Impreso. Porque o papel en sí segue a ser elemento básico na transmisión da cultura, imprescindible por agora para a confección de libros, revistas, xornais... Este último aspecto é ó que nos referimos: ó papel do papel impreso convertido en xornal.

Ningún video matou á estrela da radio, como acredita unha xa antiga canción. Ningún medio na Rede fará desaparecer os xornais escritos, alomenos no tempo que ós que actualmente vivimos nos vai tocar lembrar. E por moito que os xornais escritos estean en declive, teñen aínda unha ben gloriosa forma de decaer por moito que a crise faga que reduzan edicións, páxinas e persoal.

Se nos fosemos a fiar de rumores, máis dun e de dous xornais galegos estarían nas últimas e somente un ou dous se librarían da morte se se anulasen as axudas oficiais ás publicacións.

O peor dos panoramas preséntao o que se supón é o primeiro xornal de España, con negocio e actividade informativa en moitos outros campos complementarios, do que se teñen publicado cifras tan tremendas como que os seus activos convertibles están na orde de 1.300 millóns de € cando as súas débedas cuadruplican esa cifra, e a finais do presente mes ten que facer frente -coa crise bancaria envolvéndonos- ó pago de debeda por importe superior ó dos seus activos.

E sen embargo seguro que non hai que temer polo seu futuro porque o seu papel como papel (impreso) fará que aparezan salvadores nunca desinteresados que apoien a súa marcha que se económicamente é hacia ningunha parte, polos seus contidos sábese perfectamente cara a onde camiña.

E mentras tanto a Rede medra, día a día, minuto a minuto. Ós xornais costoulles un par de centos de anos chegar onde están, paulatinamente esquecidos polos lectores, paulatinamente máis valorados polo poder que coida que o papel impreso é infinitamente máis valioso que o de blancura absoluta. A Rede leva apenas dúas décadas e xa o invade todo. Cando o poder queira enterarse do que supón a Rede, será moi tarde.