Meu cruceiro do país
jueves, 01 de febrero de 2024
De eternidades testemuña viva,
sempre igual, velaí estás, vello cruceiro,
cravado, pétrea espada, no rueiro
sostendo tradicións e a nosa vida.
Praza na aldea teres preferías
a conquistas sanguiñentas co aceiro,
lembranza espallando dos devanceiros
e fiel compañeiro no día a día.
Pasamos nós, mais ti quedas, amigo,
paciente coma a rocha do teu corpo,
de lique revestido e de carrizo.
Sempre aberta a túa aperta sen par
a inaprensíbeis mundos e dondos
que a túa mudez nos di sen falar.
Cabada Castro, Manuel
Las opiniones expresadas en este documento son de exclusiva responsabilidad de los
autores y no reflejan, necesariamente, los puntos de vista de la empresa editora
