Cando visito algún dos recunchos preciosos que compoñen a nosa xeografía diocesana, non faltan persoas que, sentíndose orgullosas do seu pasado e do seu presente, achéganse a min para sinalarme algún detalle, algún aspecto significativo e importante da súa parroquia, do seu templo, da súa familia... Con que ilusión falan do que son, do que fan, do que lles diferencia, do que achegan á sociedade, do que viven. Os seres humanos estamos enraizados nun lugar, nunha cultura, nun contexto concreto que facilmente nos move a amalo e sentilo como propio. Só cando se ama, fálase con ilusión del; só cando se participa diso, ensínase e móstrase ao estraño; só cando se sente un parte diso, descóbrese orgulloso aos demais.
Os cristiáns celebramos o día 12 de novembro a Xornada da Igrexa Diocesana. Unha data que precisamente pretende conseguir iso entre os cristiáns, ao contemplar o que a Igrexa diocesana de Mondoñedo-Ferrol realiza permanente ou puntualmente no medio da nosa sociedade. Con esta xornada convídasenos aos cristiáns para avivar o sentido de pertenza á nosa Igrexa, a gran familia da que formamos parte polo noso bautismo.
É un día no que se quere mostrar todo o traballo, «os bos froitos» que esta familia dá ao servizo da nosa sociedade e dos nosos concidadáns: no campo do social, do espiritual, do patrimonio, da cultura, da educación, da asistencia, da evanxelización, do coidado da persoa e dos últimos, do crecemento espiritual... Certamente son números incapaces de expresar todo o que a Igrexa é e fai, pero que pretenden cuantificar e visibilizar algo do que se realiza, tomar consciencia da súa importancia vital para o ben das persoas e do noso mundo.
Ao contemplalo e ao sentirnos parte da obra que leva a cabo a nosa Igrexa diocesana nesta terra, un non pode polo menos sentirse moi «orgulloso da nosa fe». Unha «fe que se fai obras» grazas a ti e a persoas que, como ti, acollen e viven responsablemente o seu bautismo na rúa, no traballo, no templo, no barrio, na política, na economía, na familia, na escola... Convídote a que contemples a gran obra comezada e a que te sintas parte do que entre todos realizamos. Convócote a que a sigas alentando coa túa oración, co teu compromiso, co teu voluntariado, coa túa achega económica, coa túa formación, co teu testemuño... Sintámonos orgullosos de tanto como facemos entre tantos.
O voso irmán e amigo.
+ Fernando García Cadiñanos
Bispo de Mondoñedo-Ferrol
