Raíces e Réquiems (2)
lunes, 07 de agosto de 2023
Infancia
Eu non me podo esquecer
daqueles días felices
na aldea na que nacín,
onde teño as raíces.
Eu non me podo esquecer
de cando buscaba niños
de paifocos e carrizos
e de outros paxariños.
Eu non me podo esquecer
dos xogos ás escondidas
no cemiterio de Moldes,
entre as tumbas tan temidas.
Eu non me podo esquecer
da miña primeira escola,
da miña primeira mestra:
para min, raíz e póla.
Eu non me podo esquecer
das currupias e carreiros,
dos trollos das corredoiras,
das bostas e dos lameiros.
Eu non me podo esquecer
das troitas do río Mera,
dos esveltos abeneiros
verdecendo en primavera.
Eu non me podo esquecer
de meus pais e miña irmá,
que tanto por min fixeron
aquí e no máis alá.
Silva, Manuel
Las opiniones expresadas en este documento son de exclusiva responsabilidad de los
autores y no reflejan, necesariamente, los puntos de vista de la empresa editora
