Presentación na Librería Berbiriana da Coruña de Nós e álbums de guerra de Castelao (Galicia mártir, Atila en Galicia e Milicianos), por primeira vez reunidos, publicados conxuntamente por Ediciones Akal con motivo do 50 aniversario da editorial, e prologados polos escritores Carmen Blanco e Claudio Rodríguez Fer, profesores da USC.
Anteriormente, Carmen Blanco escribira sobre o humor e a muller en Castelao e publicara o libro Alba de mulleres, versión feminina de Alba de gloria. Pola súa parte, Claudio Rodríguez Fer escribira sobre o Castelao literato e editara Verbas de chumbo, reunindo os escritos deste autor feitos durante a guerra civil.
Polo seu incansable e comprometido labor memorialista ambos investigadores recibiron compartido o Premio Galicia mártir (denominación precisamente tomada do álbum homónimo de Castelao) concedido pola Fundación Alexandre Bóveda.
