A precio de saldo

Este é o momento de facer negocio, o momento de comprar. Derrúbanse empresas que ou son absorbidas –chámese como se queira á fórmula- polas administracións, ou mercadas por cantidades irrisorias por outras que no mercado suponse que estan en mellores condicións para manter o tipo.

Teñen problemas empresas que normalmente están fóra da problemática económica, aseguradoras e bancos, por agora non españolas, que sofren unha crise da que non se sabe ben se son antecedente ou consecuencia, se son causantes ou perxudicadas.

Cando é o Estado o que se fai cargo da empresa problemática, quere dicir que todos pagarán –pagaremos, no caso español- as consecuencias dunha mala xestión. Cando é unha empresa, hai que eliminar a presunción de solidariedade e incluir a posibilidade dun excelente negocio.

As fusións ou absorcións están á orde do día, con cifras que se escapan á nosa normal comprensión, pero sempre moi lonxe, o que non quere dicir que esteamos libres de que aquí pase algo polo estilo, e xa o presidente de Caixanova, Julio Fernández Gayoso, se encargou de afirmar que dada a nosa situación económica, non hai que descartar que entidades españolas se fusionen ou concentren para evitar ter que declararse quebradas.

Ó mellor deste xeito deixa de haber tantos inconvintes para que as entidades de aforro galegas se unan nunha soa caixa forte -desaparecendo os localismos de norte e sur- que poida afrontar os difíciles tempos que aínda nos quedan por ver.

En tanto, en tempos de dificultades, é o momento dos buitres. Quen teña garras, ambición e vista, seguro que fai excelentes negocios en tempos en que os negocios parecen estar pechados para todos os demais.