Estimada Ana

Vigo, 13 de febreiro de 2022
Ana Pontón Mondelo
Portavoz Nacional do BNG

Estimada Ana: O pasado 3 de febreiro no Congreso dos Deputados foi aprobada a Reforma Laboral nunha sesión, que parodiando a don Quixote cuxo desenvolvemento será mellor non recordar, pero que desde o meu punto de vista merece dedicarlle algunha reflexión.

Como presentación direille que considero ao BNG como a mellor opción para representar e defender os intereses de Galiza desde unha perspectiva progresista, encadrada no que poderíamos denominar esquerda, polo tanto, cunha prevalencia social. Entendo que a nobre función da actividade política ten que estar determinada pola procura do benestar dos cidadáns, o contrario sería unha estafa. Mesmo, atrévome a afirmar que se algunha Nación esquece este obxectivo perdería a razón da súa existencia para se converter nun obxecto alienante, desnaturalizaría o marabilloso substantivo que os gregos unían á palabra política: filantropía.

Desde esta ou parecida liña de pensamento resultoume incomprensible o sentido do voto do deputado Nestor Rego. Que o meu voto apareza ligado a un organización antisistema como VOX e ao negacionista PP produciume pasmo e fondo malestar. Non lle quedaba a opción de absterse? Que podía perder? Non me diga que desde o goberno central non falaron con el, sería un argumento infantil. Logo, votou Non, porque desde o PP, VOX... falaron con el? Sentinme como estafado e confuso, de tal maneira, que hoxe o BNG non me merece confianza, porque ante intereses de moitos galegos e galegas preferiu, na realidade, apoiar a quen os nega, algo sumamente grave. Seguro que a Reforma non é a ideal, nin a mellor das posibles, pero si sei que o NON era destrutivo para moitos traballadores e traballadoras do noso País. A Nación e o máximo autogoberno son para beneficio das persoas. As Bandeiras e as ideoloxías, mesmo, poden converterse en atrancos, que enmascaran outros intereses.

Con toda lealdade envíolle estas reflexións con ánimo construtivo.

Atentamente
Xosé María Pin Millares