Canto sabemos de droga

Sabemos o que queremos saber. As drogas, ese especial azoute social que tanta desgracia ten producido no país, son tan descoñecidas como queremos que o sexan.

Os que traballan no tema denuncian que cada vez son máis novos os que acceden a sustancias que teñen esta consideración, e que as porcentaxes son moito máis importantes do que habitualmente se pensa. E o problema non é privativo das grandes cidades senón de grandes e pequenos pobos onde os rapaces se acostumaron a este tipo de “diversións”. E hai un total de oitenta mil galegos que acumulan tres tipos de sustancias – alccohol, tabaco e droga- en mestura perigosa e case un cuarto de millón de persoas que utilizan dous tipos destas sustancias.

Pero sabemos moi pouco sobre as adicións e o perigo destas, as portas de entrada ó consumo, a incidencia nos rapaces, as verdadeiras dimensións do problema.

Falta educación sobre o tema das drogas, falta que a sociedade se implique de xeito decidido, falta que os poderes públicos tomen conciencia do que temos encima. Todos os poderes públicos.

Sabemos moi pouco da droga, e perdémonos en consideracións absurdas. Mentras tanto, a droga penetra na nosa sociedade coma un cancro. E contra o cancro, por agora, non hai cura nin vacuna.