As instalacións do Centro de Iniciativas de Turismo acolleron tamén, entre outras actividades, a fotografía, promocionándoa en exposicións e concursos.
En 1943, no mes de xullo, nas Galerías da Deputación Provincial, que levan ao Paraninfo da mesma, tivo lugar unha exposición moi visitada e que causou un forte impacto, sobre aspectos urbanos da cidade, comparando o Lugo de fin do século pasado e principios do XX co Lugo dos anos corenta. Os negativos de temas de fin e principios de século eran de Salvador Castro Freire, positivados por Valentín Roldán Regal e as fotografías actuais dos anos corenta eran deste último.
No ano 1929, o director da editorial P.P.K.O. de Vigo, José Cao Moure, publica o libro Lugo e a súa provincia, (Libro de Ouro), patrocinado e subvencionado pola Deputación Provincial e os Concellos de Lugo, Chantada, Fonsagrada, Mondoñedo, Monforte de Lemos, Ribadeo, Sarria, Villalba e Viveiro. Para reproducir no devandito libro, Maruja Mallo pintou o cadro Guía Postal de Lugo, que actualmente se atopa no Museo Provincial; tamén se reproducen diversos augafortes de Castro-Gil e sobre todo un bo número de fotografías de diversos aspectos urbanos e paisaxísticos dos diversos concellos que contribuíron ao patrocinio da devandita pu-blicación, dos seguintes autores: C. Rodríguez, R. Lamela, S. C. Freire, F. Ramos, R. Gómez Montero, Sáez, R. Barro, C. Pena e L. Gasalla, do cal se reproduce unha fotografía do estanque do parque co seguinte pé de foto: En el parque de nueva creación los cisnes prenden el acorde del agua azul y de la orilla verde, con la inmaculada pureza de sus plumajes de nieve (texto moi indicativo do talante do libro en cuestión).
Na década dos 30, e baixo a dirección de Juan Gil Cañellas, publícase o álbum As Belezas de Galicia, que consta dunha serie de fotografías, algunhas moi interesantes, de vistas urbanas, monumentos e paisaxes galegos, entre as que se atopan 46 fotografías de Lugo, repartidas en seis series: A Capital, A Catedral, Museo Provincial, A Muralla, Poboacións e Paisaxes. O autor, ao final, agradece a colaboración fotográfica, entre outros, aos autores lucenses Eladio Cornide e Manuel Vázquez Seijas.
Foron moitos os profesionais que abriron os seus estudios fotográficos ao longo de toda a provincia, sobre todo, as vilas importantes como Viveiro, Mondoñedo, Monforte ou Sarria contaron desde finais do século XIX e, desde os inicios do XX coa presenza de fotógrafos, unhas veces naturais do lugar que abrían estudio no seu pobo natal, e noutros casos forasteiros que realizaban o seu traballo dunha maneira ambulante e que nalgunhas ocasións acabaron instalándose nelas.
...
