Merlí e as gañas de facer merlinadas

Estou enganchado á serie Merlí, que coñecín hai uns anos non en tanto é agora cando teño a oportunidade de vela. Trátase dunha serie que todos os profesores debían ver, especialmente os de filosofía, xa que ten a habilidade de achegar aos autores históricos ao xeito de vida actual, levando ao alumnado a reflexionar sobre a aplicación do seu pensamento hoxe en día.

Vendo a serie, descubrín autores descoñecidos que teñen aportacións plenamente actuais como Debord que nos fala da sociedade do espectáculo, é dicir, de como as redes sociais fannos ser e ás veces actuar como se estiveramos nunha película. Merlí introduce a Debord un día no que alguén rouba unha foto e ocasiona un conflito. Isto so é un exemplo; outro pode ser o do billete do que xa falei nesta fiestra: a través dun billete de 50 euros amósalle a un alumno o seu valor, fomentando a autoestima.

As clases de Merlí son para pensar, por iso, nelas, non ten cabida o silencio. Merlí é só o introdutor dun coñecemento que o alumnado debe cuestionar. Ningún autor é sagrado, todos son sometidos por Merlí ao xuízo do seu alumnado. Isto converte a filosofía nunha fonte de pensamento dándolle unha utilidade meridiana para o mundo actual.

Aprender a pensar é o máis difícil. Ensinar a pensar é un reto irrenunciable. Traer á filosofía antiga ao mundo actual e transmitila dunha forma intelixible que permita a reflexión é un paso de xigante na formación de seres libres, iguais e capaces de cuestionar de arriba a abaixo a realidade.

Por iso, como docente non hai nada que esperte en min máis motivación que saber crear merlinadas que esperten o interese e a reflexión do meu alumnado.