A pasada fin de semana celebrouse nos Vilares a festa da Pascua e a tradicional Romaría dos Desamparados, na que a Asociación Socio-Cultural Lareira de soños se encargou de distribuir entre os romeiros e feligreses centos de folletos informativos da historia e contidos das pinturas murais da igresa para contribuir ao seu coñecemento e valoración entre aquelas persoas que habitual ou puntualmente visitan o templo orixinario do século XII, a nave máis antiga, na cal se atopan as obras pictóricas do século XVI.
Outra iniciativa da Lareira de soños na campaña que desenvolve para reivindicar a restauración destas importantes obras cuxa autoría é atribuida ao Mestre de Parga e ao Mestre de Nogueira de Miño (a chamada Capela Sixtina Galega). Consúmase así outra acción que continuará nos vindeiros meses con novas propostas dirixidas a reclamar das diferentes administracións unha actuación conxunta que leve á salvación definitiva das pinturas dun incalculábel valor.
Esta semana, o presidente da Lareira de soños, Antón de Guizán, poñerase novamente en contacto coa dirección de Património da Xunta e os diferentes partidos políticos para interesarse polo estado dos acordos da Comisión de Cultura do Parlamento Galego e seguir a reclamar actuacións urxentes por mor do grao de degradación que están a acadar os frescos con serio risco de desaparición definitiva.
A neglixencia e abandono por parte das institucións públicas obrígannos a ter que plantexarnos denuncias a nivel de estado e mesmo en Europa, así como a ter que abordar algunha campaña de recadación económica (crowgunding) para acometer traballos que eviten este deterioro.
En calquera caso, a pretensión da Lareira de soños é seguir reclamando a restauración destas pinturas até o último momento dado o desinterés do Concello, a Deputación, a
Xunta de Galicia e mesmo da Igrexa nunha actuación necesária e urxente. O concello debera ser que estivese á fronte das demandas diante de outras institucións e a Igrexa, ter incluido os frescos dos Vilares nas previsións de restauracións nos últimos anos. Úns polos outros, e a igrexa sen barrer...
É lamentábel que teña que ser unha entidade asociativa sen ánimo de lucro nin recursos que vele e se interese pola preservación do patrimonio público mentras que os organísmos responsábeis miran a outro lado.
Spot videográfico, dípticos informativos, paneis na igrexa, informes a entidades de patrimonio galegas e estatais, mestrado na UDC, iniciativa parlamentar, visitas de técnicos e políticos á igrexa, iniciativa diante da valedora do pobo, artigos, anteproxecto de restauración, entrevistas con partidos politicos ou deseño artístico de imaxe foron algunhas das nosas accións para demandar a restauración dos frescos, até agora infructuosas, pero estamos certos de que coa perseverancia e a razón, as pinturas murais dos Vilares voltarán a lucir con todo o seu esplendor.
V SÉCULOS DE NÓS/FRESCOS DOS VILARES
#SalvemosOsFrescosDosVilares