Cousas cunha segunda vida

Levo tempo vendo como polas rúas da Coruña moita xente recolle mobles ou cousas do lixo. Lonxe de ser unha mala nova paréceme que o feito de deixar algo ao lado dun contedor de lixo e que alguén o recolla significa que o obxecto desbotado vai ter unha segunda vida. Hai unha forma mellor de reciclaxe?

O problema é que andar no lixo supón un estigma pero moitas veces o desbotado pode ser de utilidade ou obxecto de reciclaxe para outra persoa. Legalmente temos que avisar ao concello e baixalo cando se nos indica. Facendo así, moitas veces o obxecto desaparece entre que o cidadán o baixa e chega o servizo municipal a recollelo. Isto é un feito coñecido por todos os que viven na cidade. O tema é se coñecemos este feito porque non poñemos medios que o faciliten e o potencien?

Habería que crear puntos, quizais máis hixiénicos que un contedor, onde quen desbota poida deixar o obxecto e quen o precisa poida botar un ollo e coller aquilo que lle é útil. Isto é unha reciclaxe que facilitaría a vida de moitas persoas e, tamén, das propias cousas que serían moito máis aproveitadas. Estes puntos deberían ter un xeito de revisar o material que constatara que realmente é susceptible de ter unha segunda vida, de ser útil de novo. Facendo isto, estaremos facendo a vida un pouco máis levadeira a aquelas persoas que pasan por unha situación límite e, ao mesmo tempo, asegurámonos de que os utensilios que creamos teñen un pleno rendemento.

Unha segunda vida é unha oportunidade para todos e aproxímanos a unha sociedade sostible e respectuosa co medio ambiente.