Alfonso de Guitiriz

Coñecinte Alfonsiño aínda en Salamanca,
andei contigo Alfonso, por terras de Trasparga,
e es hoxe , máis que Alfonso, xa un río en Vilalba,
xa un regalo que flúe polas terras da chaira,
xa un don xermolado, un pobo xa en marcha:
agora es unha canle que vés chea de auga,
de mil pequenas fontes, de mil pingueiras claras,
para apagarnos sedes, de beleza e compaña.

O Alfonsiño e o Alfonso, van na cerna da alma,
e o don Alfonso agora, asoma cheo de graza,
es don porque es regalo, de entrega que agasalla,
de verba que promove apertas solidarias:
bendígote hoxe amigo, por ser luz ateigada
da presenza divina alentando esperanza,
porque es irmán de Cristo, e con el es palabra,
do amor de Deus misterio, fiel na vida e na fala.

(Texto leído en Vilalba, o 9 de febreiro de 2019, co gallo de erguerse no Paseo dos Soños un Hectómetro Literario na honra de Alfonso Blanco Torrado).