Hai tempo, o desexo para os recén nados viña ser o de Deus te críe para boa fada, ou o que é o mesmo: que teñas moita sorte na vida, entendendo que a sorte non hai que buscala senón que ven ou non, segundo se cadre.
Un podía buscar a sorte toda a vida, e serlle esquiva ou atopala a pouco que se esforzase. E unha das probas de boa sorte era atopar algunha rareza que acreditaba que o beneficiado era seguido no mellor dos casos, perseguido- pola deusa Fortuna, en calquera das suas gradacións.
Por iso, cando se vía un conxunto de plantas de trébol xa se sabe: trébol, por tres follas- quen máis quen menos buscaba algún exemplar que, como rareza, presentaba catro follas.
Nunca ata agora atopei un trébol de catro follas, polo que teño que recoñecer que aqueles que o atoparon son especialmente tratados por algunha forza da natureza ou espíritu benigno que goberne as cousas da sorte. E de repente, atopo unha ducia, sen que a miña sorte teña cambiado, senón que a modernidade presenta outros factores que inciden nas crenzas habituais ou as derruban totalmente.
Cal non sería a miña sorpresa cando nunha visita á casa duns familiares, me ensinan unha planta especial que están cultivando e que produce exclusivamente tréboles de catro follas. Non é que estean especialmente dotados pola boa sorte, senón que tiveron a oportunidade a ver se agora a sorte radica niso- de mercar unhas sementes de trébol que produce estes especiais exemplares.
Calquera entendido na materia intuirá que un avispado investigador, dotado de bo sentido comercial, deu en manipular o Adn, ou o que funcione nas plantas, para cambiar as características da planta que en tempos era moi estimada para a producción de herba para os pastizais, e fixo aumentar as follas dos xa non tréboles, co cal o novo exemplar mantén as características da planta, alterando a súa conformación exterior.
Visto está que a sorte xa non a decide o azar senón os laboratorios, a investigación abre camiños que hai pouco parecerían incribles, e todo hai que velo con ollos diferentes á vista da modernidade. Agora si -anticipouno a zarzuela- que as ciencias adiantan que é unha barbaridade. A ver como vai a sorte.
