Fumar pode matar

No 2004 Luís Pastor publica un disco titulado “Pásalo” que contén unha canción chamada “Fumar puede matar”. Na canción di “colguemos por los pies la democracia/ hagamos un altar de su excremento/ volvamos al glorioso movimiento un momento”.

Segue falando de todas as violencias físicas e estruturais ás que se enfrontaba o momento histórico, moi similares ás que enfrontamos hoxe. Quizais cunha diferenza: a idea de democracia está máis cuestionada agora que daquela e quérese combater a mala educación limitando a liberdade de expresión; é dicir, utilizar o groseiro como desculpa para rebentar a democracia.

Hoxe, ferir a sensibilidade dun colectivo minoritario ou minorizado supón polémica. Recentemente, vímolo con Rober Bodegas ou Roberto Vilar. Vexo aquí dous aspectos: por un lado, paréceme que o humor debe de chegarse a todas as situacións e debe de ser unha ferramenta para desdramatizalas. Agora ben, polo outro lado, un humorista que quere desenvolver a súa carreira facendo rir debe ter en conta que ademais de facer rir inflúe na ideoloxía das persoas. E para ben ou para mal, fai pensar sobre o tema que está a tratar. Por iso, o humor que vive dos tópicos xa sexan aspectos físicos, psicolóxicos ou culturais á larga tórnase baleiro porque o tópico cansa.

Quizais, deberían cultivar máis o humor, desenvolvelo e facer del unha disciplina imprescindible para unha sociedade sa.

Dito isto, o humor non pode ser unha cortina de fume para tapar os verdadeiros escándalos deste país: a corrupción institucional, os títulos comprados, persoas que viven toda a vida sen traballar por ser “fillos ou netos de”, sanidade, educación, o ataque permanente ao público, persoas ás que se lles pasa todo mentres que outras van aos tribunais por un simple xuramento…

Todo iso constitúe un verdadeiro ataque á democracia que corre o risco de morrer por inanición aínda que, como dixo Luís Pastor, nunca podemos esquecer que fumar pode matar.