Pardiñas 2018

Un ano máis (e van 39!) volve Pardiñas a acollernos como matria identitaria. O vindeiro venres, sábado e domingo os que sentimos Galicia como esa “nai velliña e soñadora” temos unha cita na irmandade máis fonda. Esa irmandade que anega de cultura xeracións enteiras para trascendelas bogando o mar da eternidade.

Pardiñas é moito máis que unha festa. Pardiñas é unha forma de ser e estar no mundo. Un deleite de autenticidade que nos fai mirar novamente no espello da autoestima para enumerar todas as capacidades que pregoan o noso xenio. Artesáns da madeira, do coiro, da pintura, artistas culinarios vendendo o seu produto 100% ecolóxico, zoqueiros... etc. Comparten leira para ofrecernos cousas que só se atopan en lugares especiais como Pardiñas.

Agárdannos días de camaradaría en Pardiñas, días de apertas e reencontros programados no berce estival, días de pouco sono e moitos soños que teñen agromado en proxectos literarios e musicais porque, despois de tantos anos, está empiricamente demostrado que Pardiñas une, tece e fía, sendo a estación de partida e de chegada para a creatividade.

Pardiñas é un espazo alternativo que, a través da cultura, fai medrar o país. Un espazo progresista como a súa alma máter Alfonso Blanco Torrado que neste 2018 ficará para sempre perenne no Paseo dos Soños de Vilalba.