Feliz Día de Galicia

Feliz Dia de Galicia!. E xa está. Decimos isto, e cumprimos. Pero detrás do día de hoxe, detrás da expresión “Día de Galicia” hai un especial trasfondo que cada quen interpreta á súa maneira.

Para moitos, hoxe é o Día da Patria Galega, do mesmo que para moitos é simplemente a festa do patrón de España e de Galicia. Para falar de Galicia, temos que mirar cara atrás e acudir á Letanía de Galicia de Uxío Nonoveyra, que en tempos escuros proclamaba “Galicia digo eu; un dí Galicia / Galicia decimos todos; Galicia / hastra os que calan din Galicia / e saben, sabemos…”, e logo falaba da Galiza da dor, que choraba á forza; da tristura, triste á forza; do silencio, calada á forza; da fame, emigrante á forza; vendada, cega á forza; tapeada, xorda á forza; atrelada, queda á forza.

A Letanía de Novoneyra, prohibida en tempos, sempre en vigor, como denuncia ou lembranza, remataba proclamando “sabemos que ti podes ser outra cousa; sabemos que o home pode ser outra cousa”.

Os maiores, vivimos unha longa transición, tamén transición galega, e da Galicia das prohibicións pasamos, no decurso do tempo, á Galicia das liberdades, pero co costume de facer festa das datas importantes, facer hoxe festa de Galicia pode facernos esquecer o espíritu que ten que animarnos como membros dunha comunidade especial que os romanos fixaron no fin do mundo, os nosos devanceiros vivírona como plataforma para voar cara a emigración, e os galegos de hoxe –sempre conscientes dun desenvolvemento nunca superado- podemos confundir cun lugar case paraíso destinado a acoller turismo e ser o remate de todos os camiños a Compostela.

Por iso, cando hoxe dicimos Feliz día de Galicia queremos decir Feliz día da terra, da Patria grande ou pequena, do marco da nosa vida, do lugar que nos sostén e que case deixamos morrer de inanición poboacional. Feliz Día de Galicia será, se os galegos nos paramos a pensar qué somos, de onde vimos… se cada un de nós dedica un minuto a pensar na historia, nas lendas, na traxectoria, no destino, no futuro como pobo, que a fin de contas é o futuro de cada un de nós. Feliz Día de Galicia consciente, Feliz día de todos os galegos. Feliz futuro para todos.