Os Valuros da música

Corria o ano 92 cando un grupo de nenos e nenas comezaron a dar as súas primeiras notiñas musicais no centro escolar Ramón Falcón, facendo a súa primeira actuación nas festas do colexo.

Cando aquelas melodías comezaron a coller xeito, aquel grupiño decidiu poñerse un nome pra darse a coñecer.

Naquel momento, carentes de ideas, o mestre de relixión fíxonos a suxerencia de porlle o nome de Os Valuros.

Dende aquel momento, o grupo foi sempre da man daquel home que ía facer deses mozos e mozas unhas persoas capaces de viaxar, aprender, desfrutar e andar polo mundo.

Aquel cura, mestre, mago, xornalista, poeta, sindicalista, político un día dixo "eu considérovos a todos meus fillos" (vindo dun cura, soa algo raro), e foi nese momento no que o propuxemos para ser o noso Padriño Valuro.

Un día aqueles mozos e mozas comentáronlle ao seu padriño valuro que querían viaxar polo mundo, concretamente a un parque de atraccións. Xosé Manuel dixolles "Soñai meniños, soñai, que se se desexa con moita forza, calquera soño pode facerse realidade"

Aquela noite, os nenos soñaron con Port Aventura e a sorpresa foi que Xosé Manuel aplicou a sua máxia e a viaxe non só foi a Port Aventura, senón que chegarón ata a Francia.

No ano 2016, o grupo de Gaitas Os Valuros saca o seu primeiro disco e -como non- adicado a Xosé Manuel.

Para nos é un gran orgullo que este Centro leve o seu nome porque a cultura da nosa terra non se entendería sen o nome de Xosé Manuel Carballo.

Grazas, Xosé Manuel.

(Palabras de Ana Canto, no nome de Os Valuros da Música, no acto no que se deu o nome de Xosé Manuel Carballo ao Centro Cultural de Castro de Rei).