Galicia, millonaria

Terra de promisión parece Galicia cando nos enteramos de que as persoas empregadas neste país pasamos dun millón. Realmente, 1.077.536. Son os asegurados que rexistrou en Galicia a Seguridade Social no pasado mes de xuño, todo un record que supón o incremento do 3,89% sobre o mesmo mes do ano anterior.

Pero o que máis chama a atención é a distribución dos asegurados por sectores, xa que en Galicia so 48.663 persoas cotizan por conta propia á Seguridade Social Agraria, e 4.439 por conta allea. Hai logo 26.056 do rexime especial do mar, e 19.462 empregados do Fogar. 190.555 son autónomos, e o resto, 788.300, pertencen ó rexime xeral.

Que distante aquel país labrego e mariñeiro de hai anos da Galicia de hoxe na que nin o dez por cento dos cotizantes pertence ó sector agrario, e o groso dos asegurados corresponde ó rexime xeral: industria, comercio, servizos… Como calquera país civilizado de occidente.

Medrando a cifra de asegurados, medran as empresas e a producción. Temos superado o millón. En tempos, esto era ser millonario. Galicia, millonaria en xente que produce e traballa, ten xa máis dun millón de galegos empregados. E seguimos medrando.