Se hai que ter satélite...

Nós, coma os demáis. Se hai que ter satélite, teñamos satélite.

En tempos, os satélites eran temas e artiluxios exclusivos de norteamericanos e soviéticos, e turnábanse en logros tecnolóxicos que deixaban atónito ó mundo enteiro. Todo o máis, en España había en Robledo de Chavela unha estación de seguimento de satélites, das mellores do mundo, porque para algo esta península está posta onde está posta e ten o ceo que ten.

Andando os anos, coa unión dos Estados de Europa, tamén Europa tivo satélites. E España. E agrupacións de empresas ou empresas de comunicación en solitario. Así está o espacio de ateigado de todo tipo de materiais.

Agora, tamén Galicia, faltaría máis.

A Fundación para a Sociedade do Coñecemento, da que forman parte a Xunta, as Caixas de Aforro e as principais empresas galegas, veu falar dun satélite galego como excelente solución para a mellora de comunicación e a universalización de Internet. E o Presidente Touriño estaba no tema de poder contar cunha embaixada tecnológica aló no alto.

Ó día seguinte, o conselleiro de Innovación afirmou que un estudio da Asociación de Enxeñeiros de Telecomunicación non avala un satélite propio para Galicia e aposta por outras solucións alternativas.

Temos agora os galegos dous puntos de vista que considerar: Sí ou non ó satélite galego. Puntos de vista que –á vista está- marcan contraste de pareceres entre as dúas forzas políticas que gobernan Galicia.

Se hai que ter satélite, teñámolo. Pero (acudámos ó tópico do humor), “pa na, es tontería”. Así que, primeiro, póñanse de acordo tamén neste tema.