Seriedade nas vivendas protexidas

Somos os galegos dados a facer “tabula rasa” coa lexislación, adaptándoa ás circunstancias persoais, de xeito que facemos verdade o vello aforismo de “feita a lei, feita a trampa”.

Coas vivendas acollidas, protexidas ou subvencionadas sempre houbo manga ancha, e todos escoitamos que na primeira compra hai casos nos que se pide diñeiro negro, logo non se reside nelas, ou se venden antes do que a Lei permite por cantidades axeitadas ó mercado da vivenda normal. En fin: que aínda que o sector está perfectamente regulado, o da vivenda protexida foi ata agora un campo aberto a todo tipo de iniciativas aventureiras.

Pero – aviso ós navegantes – parece ser que a partir de agora non vai ser así e a Consellería da señora Táboas vai manter con man firme a seriedade da lexislación, aplicándoa de xeito exemplarizante para evitar sorpresas e irregularidades futuras.

En Ourense, a Consellería vai multar con 3.010 € a 43 propietarios de chalets, vivendas protexidas no concello de Pereiro de Aguiar, á beira da capital da provincia, por non residir neles. A inspección, rigorosa como se supón que debe ser, detectou escaso consumo eléctrico, descuido nos xardíns, timbres que non funcionan, suciedade, e outros síntomas que parecen claros. Os veciños teñen agora ocasión de respostar ós cargos da Consellería, e demostrar a ocupación das vivendas.

Como toque de atención, non está nada mal para poñer firme un sector que ten debilidades que compre corrixir para ben de todos.