Á beira do Camiño: Pastores

Palabra de orixe bíblica. Antigo e Novo Testamento. Xesús utilizou esa figura campesiña e mesmo afirmou: “Eu son o Bo Pastor que coñezo e amo ás miñas ovellas”. Segue a se utilizar para nomear aos bispos e cregos nas igrexas cristiás.

Os bispos (pastores) da Igrexa católica en España, veñen de estar reunidos na 89ª asemblea plenaria da CEE (Conferencia Episcopal Española) para reflexionar acerca da escola católica e dos emigrantes. Temas de actualidade. Hoxe recollemos as verbas do discurso de apertura do presidente, axeitadas ao momento. “Unha sá laicidade implica autonomía efectiva das realidades temporais respecto á estrutura eclesiástica, non así fronte á moral. Á Igrexa non lle corresponde indicar que ordenamento público e social é o preferible; é o pobo o que determina as formas máis adecuadas de organizar a vida pública. Por conseguinte, toda incursión directa da Igrexa neste campo consistiría unha “inxerencia indebida” “Pero a laicidade esixe que o Estado non considere á relixión como puro sentimento individual susceptible de relegarse ao ámbito do privado. Ao contrario, ao estar a Igrexa organizada en estruturas visibles debe ser recoñecida como presenza comunitaria pública”. Aviso aos intrépidos polas dúas bandas.Seguiremos.