Onde hai publicidade

É un clásico aquel aserto de La Codorniz que proclamaba “Donde no hay publicidad resplandece la verdad”, que viña coincidir cos estertores do tamén clásico “O bo pano na arca se vende”.

Ámbolos dous asertos pasaron, por clásicos, á historia e hoxe sábese que o bo pano hai que sacalo ó mercado e logo proclamar as súas bondades ós catro ventos.

Entre bromas e veras, algunha institución ven de gastarse cifras millonarias en editar un disco e dvd de Luís Aguilé que proclama que nunca se perde “o veraneo en Castellón”, e onte mesmo na rede de emisoras de Onda Cero o dúo Gomaespuma proclamaba as bondades das “Gijoncard”, como o mellor xeito de disfrutar das incontables virtudes da cidade asturiana coas ventaxas de esgrimir as tarxetas xixonesas.

A publicidade imponse. As campañas de difusión de pobos e lugares proliferan en todo o Estado. En Galicia parece que esa asignatura aínda a levamos de xeito renqueante.

Onde hai publicidade, hai vendas e hai rendibilidade. Se temos bo pano – o país, a paisaxe, a paisanaxe... – digámolo ós catro ventos para vender mellor.