Blanco sobre negro

Branco e negro identifican os bandos do xadrez, contrastan o Arlequín, representan luz e escuridade. Branco sobre negro: nitidez, claridade e negativo fotográfico.

Blanco, lucense en Madrid, segundo do PSOE. Negro de asfalto, Ministerio de Fomento.

Blanco, afirmando que a autovía A-76 pasará polo sur lucense, din que dixo: “A miña palabra vale máis que a de calquera responsable do Ministerio de Fomento”.

En efecto, a palabra de Blanco –en materia de fe e costumes socialistas– vale máis ca as de Fomento. En materia de estradas, coido que non.

Fomento, desde Madrid, é quen fai as estradas e só o Presidente do Goberno, xefe natural da Ministra, pode facer valer a súa autoridade, aínda que ben se comprende que ó estar tan lonxe precise información e consello de entendidos.

Eu celebro que Monforte chegue a ter esa autovía. Ese é o fondo que a todos nos interesa. Pero hai que coidar as formas, que en política son moeda de curso legal.

Que Blanco domina sobre o negro, ¡seguro!. Pero dicilo así, subordinando o goberno ó partido, sona moi forte, aínda neste concerto desafinado da política actual.