Á Beira do Camiño: Silencios Cómplices

“Cando fala o diñeiro, cala a palabra” (dito popular) Son veraces e certeiros. Froito da sabedoría do pobo. Doado de aplicar: Cando fala o poder, as avaricias, as influencias, os intereses (políticos e/ou relixiosos) os económicos, o consumo, as multinacionais... ¡cala a palabra! Molesta. Manca. Porque pon a descuberto actitudes e hipocrisías.

Durante a semana pasada (20 ao 25 ) celebrouse en Nairobi (Kenia, África) o “VI Foro Social Mundial”, con obradoiros sobre o grave e urxente problema do SIDA en África (millóns de mortes evitables), a desigualdade no mundo e a loita por unha sociedade mellor, posible, xusta e fraternal. ¡África, enferma e a morrer de fame! Silencio nos medios (incluídos os da Igrexa) Ao máximo, un recantiño aproveitable, ao informar con detalles, do que presume facer por eles o outro “Foro Económico” en Davo (Suíza)...

Estes temas non interesan. Tampouco a discriminación dos xubilados de Ourense/Lugo (co 26% menos de pensión có resto do País e menos cós de A Coruña e Pontevedra) ¿Para cando a globalización da solidariedade e reparto dos bens do noso mundo!?. Os silencios tórnanse cómplices cando non facemos algo por mudar as situacións de inxustiza.