Na primeira fila, o alcalde

¿Onde rematan as témporas e comeza a retagarda?. ¿Onde acaba a defensa da institución e comeza o intento de acomodación dos traseiros municipais na primeira fila do salón de actos do edificio da Xunta en Lugo?.

Só o Alcalde PSOE tiña reserva na primeira fila dun acto organizado por unha Consellería BNG. Pero, onde figure un Alcalde, está representada a institución, e ninguén máis fai falla para que o Concello estea digna e legalmente presente.

O resto é corporativismo ou amiguismo político non privativo de ningunha cor, que todos poden caer na tentación.

Lembro un renuncio importante, hai arredor dun cuarto de século, coa Ucd no goberno, cando unha rolda de prensa de Calvo Sotelo, entón Ministro das estradas, se celebrou na sede do Partido en vez de no Goberno Civil. Falando alí da N-VI, tan ricamente. Confusión onte e agora entre o partido e o goberno, entre a amizade e o dereito, entre a firmeza e a perrencha.

O protocolo é importante. Pero a primeira regla do protocolo sinala que a unha institución só pode representala unha persoa. Na primeira fila, o Alcalde. E así chega.