Envellecer é aprender

O día de San Xosé do ano 2016, na Igrexa parroquial de Labrada, ten lugar unha nutrida concentración de persoas maiores para celebrar o décimo sexto aniversario do “CONSEJO DE ANCIANOS DE XESTOSO-CAMBÁS”.

Preside a celebración, o Rvdo Cura-Párroco Don Luis Ángel Rodríguez Patiño, fundador, promotor e alentador da devandita Asociación.

O PROGRAMA PARA ESTE DÍA É O SEGUINTE:
-Celebración dunha misa coa Unción de Enfermos incluída para darnos forzas para vivir con dignidade esta etapa da vida.

-Lectura dun manifesto titulado: “ENVELLECER É APRENDER” a cargo de Mercedes Cachaza Platas, Presidenta do Consello de Maiores de Paderne.

-Un xantar de confraternidade nun restaurante da zona.

-Moita convivencia e moita harmonía para intercambiar experiencias enriquecedoras entre persoas maiores desta comarca.

MANIFESTO: “ENVELLECER É APRENDER”
Despois de moitos anos xuntos, reunímonos hoxe, unha vez máis, nesta igresa de Labrada, baixo a protección de San Xosé e a nosa Naiciña, Santa María de Labrada, para agradecer o feito de poder estar aquí todos xuntiños dando grazas polos anos vividos e pedindo axuda para disfrutar dos que nos quedan:

-Grazas, por tantas e tantas oportunidades que se nos deron ata o día de hoxe.
-Grazas, por tantos anos de vida.
-Grazas, pola saúde disfrutada.
-Grazas, polas persoas que nos acompañan no camiño da vida.
-Grazas, por disfrutar dunha terra tan fermosa.
-Grazas, por recibir a fe cristiá no seo da nosa familia e na Igrexa Católica.
-Grazas, por tódolos favores recibidos.
-Grazas, polo que temos e sobre todo polo que somos.
-Grazas, por tantas e tantas emocións que sentimos neste momento, aínda que non teñamos palabras axeitadas para manifestalas.

Resumindo:

Grazas por todo, porque todo colaborou a que hoxe sexamos quen somos e como somos.

Pero queremos seguir pedindo axuda para disfrutar dun futuro prometedor, porque aínda nos queda moito que aprender:

-Aprender a querérmonos convivindo cos achaques propios da idade, mostrando en todo momento agradecemento pola vida que se nos regala.
-Aprender a comportarnos coas novas xeracións, admitindo que cada xeración ten as súas particularidades.
-Aprender a estar sen entorpecer o proceso da vida de cada persoa, porque cada persoa é única e irrepetible e ten a súa propia historia.
-Aprender a disfrutar desta etapa da vida sen perder un minuto, porque o tempo apremia.
-Aprender de San Xosé que conservou a fe e foi fiel ó seu cometido aínda que a veces non entendera moi ben porque lle pasaban aquelas cousas a el.
-Aprender de San Xosé a pasar pola vida facendo caladiñamente o que nos corresponde.
-Aprender da Virxe María a gardar moitas cousiñas no noso corazón como fixo ela na súa vida terrenal.
-Aprender a crer contra toda esperanza, porque algún día comprenderemos cal foi a nosa misión nesta vida.
-Aprender a aprender porque mentres aprendemos estamos exercitando as nosas facultades mentais e consevámonos xoves de espírito.
-Aprender a agradecer todo canto ben nos fan as persoas que nos rodean.
-Aprender a dar cando nos pidan axuda.
-Aprender a recibir cando se presente o caso porque nesta etapa da vida – máis que nunca- imos necesitar moita axuda.
-Aprender a valorar a nosa riqueza como galegos: a nosa fala, a nosa cultura, a nosa gastronomía, a nosa paisaxe, a nosa terra, o noso mar, a nosa historia….

En fin, aprender a valorar todo o legado polo que tanto loitaron os nosos antepasados.

E cando nos toque a hora de partir:

-Partir coa satisfacción de ter aproveitado as oportunidades que nos presentou a vida.
-Partir coa satisfacción de ter loitado con tódolos medios ó noso alcance e con tódals nosas forzas para deixar un mundo mellor para os que veñen detrás.
-Partir coa concienca tranquila.
-Partir en paz e descansar na paz.

Se así o facemos, a nosa misión estará cumprida.

Coa axuda de Deus, de San Xosé e de Santa María de Labrada, chegaremos a bo porto.
Esa é a nosa esperanza e a esperanza nunca defrauda.