Convivio de todas as artes

O vindeiro domingo imos participar do nacemento dunha nova criatura, o libro VALURIA de Xosé Otero Canto en Castro de Rei, ilustrado por un artista excepcional: Anxo Grande Penela.

É festa na cabeceira de comarca, na beira do río que asolaga aquelas terras de enerxía e fartura. Alí estaremos outra xeira Xermolos e varios colectivos co ánimo de seguir convivindo coma noutrora, no 1978, cando fomos celebrar alí a primeira Festa Balura.

Esta obra do poeta da Ponte de Outeiro, veciño ao pé do Miño do seu precursor de rimas e ensoñacións Crecente Vega, abrolla nun leito máxico. Non nace desamparado, xa trae varios bolos de pantrigo baixo o brazo que imos partillar nesta tarde, a partires das 4,30 no Teleclub. Cóntase que cada ser nace co seu destino e este Valuria ven á luz con verbas e trazos gráficos marabillosos.

A comunidade valura vai nomear “Baluros de Honra” a este escritor, e tamén a Isaac Rielo e Anxo Lamas. !Madia leva tanta festa con estes padriños!. Asemade o pintor Anxo Lamas vai agasallar coas súas táboas a todas e todos os que forman os Baluros de Teatro que levan máis de corenta anos espallando gozo e xoldra nos estrados do país e da Galiza da emigración. Outros tantos froitos da arte prodixiosa do creador de Bazar. E Isaac tampouco vai retraerse nesta fervenza de todas as artes e vai achegarnos a súa Aproximación histórica ós míticos Baluros ou Valuros, acompañada dunha Breve reseña biográfica sobre este autor escrita por Xosé Manuel Carballo, a alma de toda esta festa, e nesta demostración da vitalidade da cultura rural, o celme de Galiza, vai nomearse “Baluro de adopción” a Xavier Rodríguez Couce (o novo cura de Castro de Rei).

Neste día Os Baluros de Teatro non van escenificar a súa representación “Vaise pechar outra casa máis” doutrora, senón que van abrir o telón a moitos séculos de vida e futuro do noso rural, acompañados das alboradas dos Valuros de Música. Naqueles comezos de toda esta explosión de enerxía descubrimos como a Chaira é unha rexión con moitas tribos e comarcas como nos descubre Felipe Arias no limiar do libro que presentamos este domingo 28.