Seguridade no tráfico

O primeiro domingo do mes de xullo (tamén comezo de vacacións) a Igrexa católica de España celebra a “xornada de seguridade no tráfico” co o afán de colaborar con outros estamentos oficiais e privados na mellora dunha circulación máis segura e humana.

O lema do 2006 vai na liña de dous acontecementos puntuais: “Pensa na túa familia. Non perdas puntos”. Recolle a mensaxe do Vº Encontro M. das Familias en Valencia e a novidade do “carné por puntos” que vimos de estrear. A Administración quere garantir un tráfico máis seguro e fluído á vista da experiencia positiva de países veciños.

A familia, o ámbito educativo primeiro, a célula vital da sociedade, a primeira escola das virtudes sociais debe axudar e propiciar ir educando no aprecio ao valor da vida e da dignidade da persoa, no coñecemento e respecto ás normas que regulan o tráfico, na tolerancia das imprudencias dos demais e na cortesía e espírito á hora de prestar axuda. E non cabe dúbida dos beneficios que prestan á sociedade tanto os medios mecánicos coma as redes de autovías/estradas para a comunicación e unión entre os pobos e o seu desenvolvemento económico. Tamén paras as relacións humanas. Hai que agradecelos. Pero este beneficioso avance, que segue a se perfeccionar, produce efectos negativos (perda de vidas humanas, traumatismos, dor nas familias) que cómpre endereitar.

Estatísticas a ter en conta. Moitos accidentes e a maioría das mortes son evitables. Está comprobado que o alcohol, o exceso de velocidade e as distraccións (móbil incluído) seguen a ser as principais causas dos accidentes con mortos no noso País. Algúns datos: O exceso de velocidade duplica a mortalidade nas Comunidades do País Vasco, Madrid e Galiza. Os últimos accidentes da Costa da Morte (na que morreron varios rapaces por pistas secundarias) xunto coas distraccións ao volante ( un 39% dos sinistros no ano 2004, con 55.818 vítimas cun aumento dun 75% do 1993-2003) confirman o dito. Preto de 700.000 persoas conducen con somnolencia. (O 20% dos accidentes). En Galiza 1.000 persoas deron positivo e ían “sen cinto de seguridade” os últimos días.

A política está clara: Máis concienciación con información transparente e campañas. E máis represión, co “carné con puntos”. Quen se pasa, paga; incluso, co cárcere! Os imprudentes, volverán ás clases. Con amplo respaldo dos políticos e da sociedade chegando ate á reforma do Código Penal. Que todo sexa para pór fin a tanta morte absurda e a tanto sufrimento evitable. Todos e todas podemos e debemos facer algo para irmos erradicando este perigoso cancro inoculado nesta sociedade da pos/modernidade.

Agradecendo a boa e ampla acollida á reflexión Á BEIRA DO CAMIÑO deséxolles un bo verán. Se non hai novidade, volveremos polas festas do noso Patrón, San Froilán.