Opinión en Galicia

Buscador


autor opinión

Editorial

Ver todos los editoriales »

Archivo

Lembrando Adolfo Bravo Lozano

domingo, 21 de junio de 2015
Prezado Adolfo: Fágoche chegar unhas liñas desde a beiriña da praza do Obradoiro para desculpar a miña ausencia no acto recordatorio que agora mesmo están a celebrar os teus amigos e familiares en Bos Aires. Ti ben sabes que desexaba estar aí no “Valle Inclán” para aplaudir a Virginia. Aquí embaixo, neste teu curruncho galego, imos amodiño cara ao verán que agardamos veña cheo de sol para escorrentar a humidade dos ósos.

Sei que estás sorprendido polo CABODANO conmemorativo pero tes que aceptar que fuches un moi importante promotor da cultura galega na Arxentina. O teu estilo de boa onda, sempre cun sorriso, fixo reflexionar a miles de herdeiros na nosa terra que vivían afastados dos cantares de Rosalía de Castro. A túa paixón galega ten agora centos de seguidores nos agradecidos alumnos de Avellaneda e da Prata. Sen esquecer aos namorados de Galicia por viaxar da túa man. E así, meu amigo, non esaxero nadiña.

O fillo maior de don José de Dumpín é recordado con fondo agarimo desde os montes dos Ancares ata os penedos de Pasarela. En todas as aldeas lembran a túa conversa de comprometido defensor do noso rico patrimonio artístico e natural. Non había muíño que non quixeses coñecer. Non había auga da fonte que non quixeses beber. Nos teus roteiros por Galicia ías en aliaxe coa paisaxe e por iso podías trasmitir harmonía aos teus compañeiros de viaxe.

Teño moitas mensaxes para ti de amigos e coñecidos pero non debo estenderme xa que os asistentes que rebordan o “Valle Inclán” están agardando para aplaudir un novo tema de Virginia. A voz da túa sobriña lévache a máis fonda aperta de amistade de todos os que participan na homenaxe para o moi distinguido fillo porteño das terras de Castro de Rei. Saúde e Terra!

(Texto de Manuel Suárez Suárez leido no cabodano de Adolfo Bravo Lozano, na Arxentina)
Suárez Suárez, Manuel
Suárez Suárez, Manuel


Las opiniones expresadas en este documento son de exclusiva responsabilidad de los autores y no reflejan, necesariamente, los puntos de vista de la empresa editora


PUBLICIDAD
ACTUALIDAD GALICIADIGITAL
Blog de GaliciaDigital
PROMOCIÓN
PUBLICACIONES
Publicaciones
Publicaciones Amencer
Revista Egap
Obradoiro de Artesania