Servicio de Correos

En tempos, Correos funcionaba con tal prontitude e regularidade que había a seguridade que unha carta selada nunha capital galega, vintecatro horas despois sería entregada en Madrid.

Posiblemente hoxe sexa o mesmo nivel de servicio, pero non temos esa seguridade.

Esa seguridade véñennola dar as empresas privadas que xurdiron como fungos garantindo a case inmediata entrega de envíos por cantidades máis de dez veces superiores ás que Correos percibe.

En tempos, o servicio en Correos era tan persoal que os carteiros, veteranos de mil batallas, podían adiviñar a metade dos datos do destinatario e entregar cartas que estaban chamadas a non chegar xamais.

“Manuel María. Monforte”, bastaba con poñer para que as cartas chegasen á rúa Roberto Baamonde onde vivía o escritor.

Contrasta co sucedido días pasados cunha carta dirixida a un coñecido deseñador da Cerámica de Sargadelos. A carta, ademáis do nome, indicaba “Sargadelos.Cervo(Lugo).27.8882. Pois foi devolta por “Señas insuficientes”. Incomprensible.

Sargadelos, efectivamente, é unha poboación. Pero tamén é unha cerámica que todo o mundo coñece, un Conxunto Histórico-Artístico, e esta Cerámica e a súa historia supera calquera outro límite. En tempos, a carta houbera chegado ó seu destino.

Beneficio para os servicios privados de transporte. Pero Correos, agora, tamén está privatizado. ¡Pois que se note!