Un parlamento divertido

Hai uns días, o Parlamento de Galicia viviu momentos de apuro. De apuro democrático.

Nas votacións, Psoe e Bng superan ó PP pola mínima, habitualmente. Pero non sempre, xa que para eso teñen que estar presentes tódolos deputados da Cámara.

Normalmente situacións así son problemáticas para a maioría gobernante, porque os deputados desta maioría adoitan estar máis ocupados que os da oposición.

Os deputados da maioría poden ser conselleiros, directores xerais, e ata Presidente ou Vicepresidente da Xunta de Galicia. E tamén confiarse e padecer absentismo ou deterse máis da conta na cafetería da planta baixa do Parlamento.

Hai poucos días houbo unha votación que puido acabar en traxedia política. Poñamos que a votación estaba prevista para a hora H, e non había problema porque tiña que intervir un deputado do Partido Popular, ó que se lle supuña expresividade ou amplitude.

Pero o deputado popular, fose porque veu a tódolos seus compañeiros disciplinadamente sentados, ou porque non lle apeteceu abundar no tema, pasou da intervención, co que se impuña a votación.

De facelo, houbese perdido a coalición de goberno.

A Presidenta suspendeu a sesión durante o tempo preciso para que os ausentes comparecesen, algúns de tan relevante actividade como os deputados Quintana e Touriño.

Estando xa todos xuntos, como corresponde, gañou o grupo con máis votos, que resultou ser a coalición gobernante.

Este Parlamento non permite baixas, nin retrasos, nin absentismo… Non permite unha soa diversión. Pero para todos nós vai ser (democraticamente) divertido.