O Ateneo Ferrolán

Recibo unha carta do Ateneo que convoca unha asemblea ordinaria na que se vai a pedir autorización aos soci@s para vender patrimonio e avalar o importe do almacenamento que se debe a unha empresa de mudanzas onde se depositou toda a documentación: biblioteca, hemeroteca, etc... no prazo que duraron as obras de rehabilitación da sede de Magdalena e até hoxe, a pesar de que o inmoble leva tempo operativo. Non acerto a entender o desencontro que arrastran a entidade e a área de Cultura do Concello de Ferrol.

Creo que debe respectarse aos ateneos como células dinamizadoras da cultura, como masa social e como legado histórico de raíces decimonónicas no caso do ferrolán. Non hai respecto pola historia, non hai respecto polo acervo cultural cando a todo se lle aplica o cristal ideolóxico establecendo as barreiras infranqueables do estás comigo ou estás contra min. A área de Cultura do Concello rexido polo PP amosouse no seu día belixerante co Ateneo, reparcelando por "decreto" a súa sede da rúa Magdalena para dar cabida a outras entidades, cuxas necesidades de espazo non dubido, mais cuestiono a forma na que se levou a cabo. Pero, ademais, dáse a circunstancia de que ninguén pode consultar, ninguén pode facer uso dos recursos de que dispón a sociedade porque están "secuestrados" e o Concello négase a botar unha man ante a impotencia do Ateneo de pagar o que debe e poder liberar o seu patrimonio.

E isto vaise a solucionar vendendo cadros e outros obxectos de valor de titularidade da propia sociedade cultural? Incrible. Case diría que resulta escandaloso. É verdade que tampouco observo sensibilidade algunha por parte da empresa que custodia o material que tamén podería atopar unha fórmula de pago aprazado, cómodas cotas, ou o que sexa, e desa maneira envolver en certo brillo de mecenado ao propio negocio de mudanzas, pero se cadra é moito pedir.

Emprazo serenamente ao alcalde a que desfaga este agravio, a que deixe en bo lugar o papel da primeira institución local e non permita que esta situación se enquiste máis e alcance notoriedade en detrimento ou desprestixio do nome de Ferrol. Apelo á miña condición de socio fundador do Ateneo, de xornalista e cidadán que tamén exerceu modestamente o seu compromiso coa cultura desta cidade nas últimas décadas, para demandar unha solución amigable que permita á entidade cultural liberar o seu valioso fondo documental sen necesidade de polo parcialmente en venda, quedando así a disposición de estudiosos e investigadores, como foi sempre. Estou convencido de que existen vías de entendemento. Só ten que haber vontade política.