O Peto das Pensións

Desde o Preguntoiro: O Peto das Pensións
Desde que chegou este Goberno ao poder en decembro de 2011, o PP foi votando man do peto de pensións en unha morea de ocasións, a última no pasado mes de decembro que sacou mil trescentos millóns de euros. A este ritmo de gasto, uns nove mil millóns ao ano, o peto quedará esgotado en 2019.

Este Fondo de Reserva de pensións garantida polos pactos de Toledo, que fora aprobado polo pleno do Congreso dos Deputados o seis de abril de 1995, onde non se podía retirar diñeiro, estaba ao ano 2010 en preto de setenta mil millóns de euros, agora o temos 40 mil millóns tres anos despois, ou sexa, saquearon un 40%.

Desta maneira, estes saqueadores gobernan e levan o diñeiro aforrado de todos os españois para os seus “amiguetes” da banca (Bankia, Caixas) e grandes empresarios corruptos, favorecendo á banca coas pensións privadas. Dentro de pouco nin teremos sanidade, ensino nin pensións, están liquidando todo en honra a súa ideoloxía neoliberal. A todo isto engadimos a “rifa” dos medicamentos (segundo a clase médica son os máis caros dos países do noso entorno) cos enfermos de hepatites C que están morrendo a 10 cada día, aos “jubiletas” xa nos están poñendo a tarxeta “roxa”... en forma de “necrolóxica”.

A mensaxe está moi clara, pensan morrer matando, ou sexa vendendo este país ás multinacionais, baldeirando as petos do aforro de 20 anos dos españois. Mentres este goberno fai subir o déficit como un globo de helio, eles falan cunha cara dura como o cemento coa canción de tódolos días para ilusos: España crece máis que ninguén. A economía está despegando (aeroporto de Castellón). Xa saímos da crise (estafa) e xa é historia... Temos que saber ata onde condenáronnos este feixe de... ao mando do Sr. dos “hilillos”. ¿Que cousas tan malas fixemos nós para merecer tantas falcatruadas?.