Un despegue sen controladores

Desde o Preguntoiro: Un despegue sen controladores

Na tradicional roda de prensa de balance do ano o Sr. Rajoy dixo: “no ano 2015 será o despegue definitivo da nosa economía”. Temo moito que o despegue se faga sen controladores desde o aeroporto de Castellón, iso quere dicir que imos alucinar en colores e defecar masilla.

Coido que nós, os paganos... somos os que non nos decatemos ben. Mirade que poñen todo o seu empeño en explicárnolo... pero nada, somos moi duros de miolos, estudamos nas escolas públicas... e así vainos na vida. O que quere dicir este Sr. do Lérez: que todo vai mellor que o despegue vai ser en “diferido”, é dicir, “en tempo e forma... como se lle supón”. Mellor que o volva a explicar, pois eu non me aclaro. O sinto, son moi burro. Aínda que para poder entendelo mellor que o explique a Sra. Mariloli Cospe.

Pode ser que entre o “plasma” e o “diferido” están a falar doutro país. Ese país onde un Ministro do Interior considera que interceda Santa Teresa de Jesús por España. Ou a influencia da Virxe del Rocío na saída desta crise (estafa). Ou pode ser que ese despegue do que falan teña algo que ver co Ministerio do Interior na condecoración á Virxe do Pilar.

Do país que eu falo, segue crecendo a desigualdade, pobreza e a precariedade laboral. A lamentable situación á que nos levou a política deste Sr. de gobernar para un 8% do máis podente deste país, sen recoñecer publicamente o nefasto das súas medidas para o resto dos cidadáns. Un país onde o peor que se esconde por parte do Goberno, é a falta total e absoluta de crer na democracia e liberdade, vulnerando esas liberdades a base de leis e decretos; este é o país onde eu vivo. O Sr. Rajoy fala doutro “casposo” país.