"Os Vilares, lareira de soños" destaca 19 persoas ou colectivos pola súa relación coa parroquia.
Despois de ter destacado a Díaz Castro como "Trapeiro de Honra 2014", agora nomean a outros 19 persoeiros, colectivos, lugares ou iniciativas. Entre elas atópase Jaki Quintela, autor do poemario "Delta" que verá a lugar a comezos do 2015 editado por Xermolos.
'Os Vilares, lareira de soños' fixo pública a listaxe de vilaregos e vilaregas destacados neste 2014, ano dedicado ao poeta do Vilariño Xosé María Díaz Castro.
Precisamente o escritor xa recibira a distinción de "Trapeiro de Honra 2014", un galardón creado por este proxecto parroquial que pretende recoñecer, cada ano, a un vilarego ou vilarega que teña destacado nalgún ámbito.
A listaxe de persoeiros destacados este ano increméntase coas figuras de Pilar Losada Paz, veciña dos Vilares de 108 anos e residente en Euskadi; e Segundo Pérez López, nomeado Deán da Catedral de Santiago.
Tamén destacan a Xosé Antón Cascudo, como mellor cineasta, por 'O instante eterno' e Jaki Quintela, como mellor traballo literario, por Delta, un poemario que verá a luz na primeira quincena de xaneiro editado por Xermolos. E, no caso de mellor artigo xornalístico, nomean a Man Castro, por "De Lazos e perfís", pola súa identificación coa parroquia e os seus antepasados vilaregos.
A distinción como mellor valedor dos Vilares no exterior, grazas aos seus traballos sobre Díaz Castro, é para Armando Requeixo; e o mellor discurso recae, segundo 'Os Vilares, lareira de soños' en Xulio Xiz pola Romería Labrega da Chaira; mentres que a mellor composición musical consideran que foi "Pedro Trapeiro", de Fuxan os Ventos, e a mellor cantante, Arantxa Álvarez da Orquesta Os Satélites.
Noutro eido, destacan a Joserra Quintela como mellor deportista polos destacados triatlóns e probas de resistencia realizadas. Tamén á Asociación Cultural Xermolos pola campaña de restauración da casa de Díaz Castro.
Por outra iniciativa, cren que merecen distinción as rapazas de Pena Fachada, Amparo e Carmen, pola súa explotación. María Teijido é nomeada na categoría de "mellor persoa moza" pola súa grande identificación cos Vilares. E tamén destacan o anticuario dos de Xacobe como mellor empresa pola superproducción cinematográfica "Exodus" e o "lugar do ano", O Vilariño.
No eido cultural cren que a mellor organización dun evento foi desenvolta pola comisión de festas da Pascua sobre as que tamén destacan o roteiro de Díaz Castro impulsado no seu seo como "mellor evento cultural"; aínda que tamén lembran a XXIV Romería Labrega da Chaira como "mellor evento tradicional".
"Poderían ser outros e máis, pero prometemos facer unha listaxe cada ano", manifestan os responsables do proxecto encabezados por Pastora Veres que nesta ocasión considera merecedor da distinción de "personaxe da Historia dos Vilares", a pesar de ter mantido relación con moitos veciños e veciñas durante a preparación do libro e documental, ao señor Pedro de Patricio, o Trapeiro.
