Arredor do Nadal

Estamos xa na edición XLIII de O NADAL EN BEGONTE, un tempo diferente que vivimos neste concello chairego desde que demos en artellar un Belén Electrónico para mellor achegármonos á máis fermosa efeméride da nosa historia.

E se a cada edición desta xa longa traxectoria poderiamos asignarlle cadanseu acontecemento, celebración ou punto de inflexión, neste momento o feito máis destacado é a declaración do Belén e as súas actividades como Festa de Interese Turístico Galego por parte da Xunta de Galicia.

Aínda que o aspecto turístico non sexa o máis relevante da nosa esencia e da nosa existencia, si é importante polo que se refire á súa repercusión na atracción das xentes a contemplar esta manifestación religiosa, cultural e social que reflicte o nacemento de Deus desde unha perspectiva galega e chairega.

Esta declaración, fará ao noso Belén aínda máis coñecido, aínda máis visitado, e polo tanto tamén máis estimado, conseguindo cumprir cada vez en maior medida o propósito inicial de divulgar o feito do Nadal e, á súa vez, contribuir a un maior coñecemento e impulsión do Concello de Begonte (Begonte do Belén).

Coa nosa invitación a tódolos galegos e aos que queiran sentirse galegos connosco, abrimos as portas do Belén Electrónico de Begonte e do Museo do Belén, de par en par, un ano máis, para vivir todos xuntos este especial tempo de ilusión, de amor e de paz.

(Jesús Domínguez Guizán é Presidente do Centro Cultural “José Domínguez Guizán”. promotor do Belén Electrónico de Begonte).