A Quenlla: o noso pan

Meus queridos amigos:

Van alá 30 anos dende que decidistes asumir a lenta, custosa e infinda tarefa de espertar conciencias; de recuperar o valor da palabra entre cordas liberadoras de música e ensinarnos a nós, á vosa xente, ao voso pobo, toda a beleza que fomos capaces de crear co único tesouro dunha lingua propia (espiña dorsal, matria na que berra, se namora e acouga a nosa identidade).

O voso foi andar camiños, recoller cultura erguendo a voz sempre e sempre poboando de tenrura a febleza que tecnócratas e salva patrias desterran ao silencio. Contra ese silencio sodes o noso pan, o noso impulso aos poetas, fariña de primeira que nas vosas mans de voces colectivas tece un futuro de pobo ergueito na esperanza solidaria da irmandade.

PARABÉNS E LONGA VIDA AOS QUE NUNCA CALASTES. AOS QUE XAMAIS CALAREDES.

Iago Santalla, Vilaxuste setembro 2014


(Texto de Iago Santalla, lido por David Otero no decurdo da homenaxe ao Grupo A Quenlla polos seus primeiros trinta anos).