Pucheirazo Habemus

Desde o Preguntoiro: Pucheirazo Habemus

Todo semella sinalar, segundo o goberno e reflectido nos xornais, que o PP está disposto a modificar a lei electoral municipal. Ou sexa, prepara un “pucheirazo” electoral para manterse no poder, que a minoría domine á maioría xa que están en xogo o desarme desas redes caciquís que teñen instaladas desde fai décadas. Feita a lei feita a trampa, pois segundo a forma de facer esa lei, condiciona o resultado.

A vicepresidenta do Goberno Soraya Sáenz de Santamaría en roda de prensa, saíu dicindo que esta lei é unha rexeneración da democracia, non sei se o dixo de coña mariñeira ou pode ser outra mentira máis das que levan dicindo, Tamén pode ser que sexa unha volta ao pasado daquela “democracia orgánica” de triste lembranza.

Estamos ante outra volta de parafuso, un ataque máis á liña de flotación deste barco xa tocado co rol de “democracia”, sendo o obxectivo de asegurar o poder municipal para seguir mantendo o seu programa de reformas cavernícolas e regresivas.

Estes corsarios da “política” farán todo o que atopen nas súas mans para manterse no poder e aqueles que o toleran, que llo permitan, serán cómplices desta infamia.

Mentres non se reforme a lei electoral, cun sistema máis proporcional, máis xusto, unha persoa un voto, poderán chamalo como queiran, pero democracia desde logo que non o é. Un estado nunca pode ser democrático, cando no seu sistema electoral todos os votos non teñan o mesmo valor.