Uns 'cidadáns' exemplares

Desde o Preguntoiro: Uns “cidadáns” exemplares

O que torto nace, tarde ou nunca se endereita, este vello refrán galego faime lembrar ao noso primeiro mandatario deste apodrecido país. Remata de entrar no “talego” o Jaume Matas o corrupto de Baleares, un home do que falaba o Sr. Rajoy con estas palabras: “quiero en España lo que él ha hecho en Baleares”. Carlos Fabra, outro que era moi especial para o presidente cando falaba del dicía: “..Es un ciudadano ejemplar...”. Sobre Jenaro García o empresario “exemplar”, entregoulle un premio eloxiando o seu traballo, sería cando xa mangara os millóns. Do valenciano Francisco Camps, o Sr. presidente comentaba: “...Francisco es un ejemplo de gestión...”. ¡Manda carallo na Habana!.

Se xuntamos todos estas louvanzas do presidente a esta tropa, nada estraña que neste barco chamado España, ao mando deste patrón vaia ao garete. En calquera país do noso entorno europeo xa tiña que estar dimitido e convocando eleccións.

Parece que comeza o desfile (agardando indultos) desta xente “ilustre”. O malo non é iso, o malo é a grande cantidade de xente que debendo estar, non están. Se este país fora Francia, outro galo nos cantaría a todos, no país veciño non andan con “chiquitas”, non; alí, os xuíces son independentes e se teñen que chamar a declarar a alguén (aínda que sexa o mismisimo presidente), o fan e rapidiño, e sobre todo, nada de aforamentos.

Porén, penso que isto non é limpeza nin é nada, están escondendo a bosta debaixo da alfombra, para dar o exemplo de que isto está impoluto, queda moito por airear, así que non nos tomen por ignorantes . Imos ver, Sr. Rajoy, ¿este é o modelo exemplar que quería para este esperpéntico país?.

Cando toda esta tropa vaia entrando (sen indultos) na “universidade”, os internos que teñan coidado coas carteiras.