Boa noticia

Levabamos moito tempo agardando por algunha boa noticia.

Máis de cen días de goberno trouxeron primeiro as imaxes do cambio persoal, logo a asunción de poderes con ilusión e curiosidade. Despois, suponse que o estudo de presupostos e posibilidades para o próximo exercicio, que será o primeiro no que actuar en libertade. Hai unhas semanas, a decisión dun par de conselleiros de anula-las decisións dos seus antecesores coa inherente revolución dos alcaldes afectados. E agora, en fin, agardando polas boas noticias que o novo presuposto ten que darnos en
relación con obras, proxectos e realizacións, tanxibles e concretas.

E, de repente, Touriño Presidente pode darnos unha boa noticia que se refire á cidade da Coruña que por fin vai contar co gran Porto exterior, aló por Punta Lagosteira, que vai alonxar para sempre os perigos dos Urquiola e similares, xa que os grandes petroleiros non van ter que entrar no porto da Coruña a manobrar en lugares onde non se pode manobrar, evitando catástrofes.

Ós galegos fannos falla noticias coma esta. A Touriño e ó seu goberno, tamén.

Aínda que só sexa transmisión, e a solución -sesenta por cento da solución, concretada en arredor de douscentos cincuenta millóns de euros- veña de fóra. Necesitamos boas novas, grandes ou pequenas.

Nesta ocasión, Toruiño é só o mensaxeiro. E do mesmo xeito que non é lícito matar ó mensaxeiro portador de malas noticias (gran perigo dos mensaxeiros que na antigüidade levaban noticias non gratas), tampouco o das boas merece a coroación pola simple transmisión.

Pero queremos crer que é o comezo dunha racha de bos anuncios para Galicia por parte do chamado a facelas como cabeza dun goberno, aínda que sexa bicefálico, ó que lle é imprescindible facelo moi ben para garantirse continuidade e permanencia.