¿Apestados?

A insólita actualidade xerada estas últimas semanas pola actividade municipal da capital, lévame a consultar o artigo 61 da Lei de bases de réxime local, logo de que dúas agrupacións políticas que forman parte dese consistorio reclamaran publicamente -e creo que nun dos casos incluso formalmente- a disolución da corporación seguida da celebración dunhas 'eleccións parciais' que terían como horizonte o mes de maio de 2015.

Vou entón á rede e leo un primeiro parágrafo que di: 'El Consejo de Ministros, a iniciativa propia y con conocimiento del Consejo de Gobierno de la comunidad autónoma correspondiente o a solicitud de éste y, en todo caso, previo acuerdo favorable del Senado, podrá proceder, mediante real decreto, a la disolución de los órganos de las corporaciones locales en el supuesto de gestión gravemente dañosa para los intereses generales que suponga incumplimiento de sus obligaciones constitucionales'.

Logo, o segundo parágrafo explica: 'Se considerarán, en todo caso, decisiones gravemente dañosas para los intereses generales en los términos previstos en el apartado anterior, los acuerdos o actuaciones de los órganos de las corporaciones locales que den cobertura o apoyo, expreso o tácito, de forma reiterada y grave, al terrorismo o a quienes participen en su ejecución, lo enaltezcan o justifiquen, y los que menosprecien o humillen a las víctimas o a sus familiares'.

Posto, pois, negro sobre branco, o que di a lei -por se vostede non tiña tido oportunidade de lela-, supoño que agora coincidirá comigo en que por moi grave que sexa o que está acontecendo na Casa do Concello de Ourense, non se dan as condicións 'de terrorismo, etc., etc.', para que ningún dos órganos do Estado que cita o artigo interveña e lle retire ós actuais representantes municipais esa representación que democraticamente lles outorgou o electorado ourensán.

E non sería máis sinxelo, legal e democrático -digo eu- que, chegados ó nivel de ingobernabilidade ó que chegou o actual equipo de goberno municipal, sen ter que andar reclamando a intervención ó Consello de Ministros, do Consello de Goberno da Xunta e do Senado, o alcalde tivera un arrouto de lucidez e dimitira co fin de elixir un novo presidente da corporación, que sería -tamén o di a lei, neste caso electoral- en segunda votación 'el concejal que encabeza la lista que haya obtenido mayor número de votos...'

Velaí a solución máis sinxela. Ou a dunha moción de censura. ¿Ou é que o partido maioritario está formado por 'apestados'? ¿E se son uns apestados, son apestados tamén os que os votaron?